پیش لفظ

جمعرات کا روز، برصغیر پاک و ہند میں، پیروں فقیروں کا دن مانا جاتا ہے۔ ہندو مسلم، دونوں معاشروں میں، اِس دن کو ایک خاص حیثیت حاصل رہی ہے۔ میرے اور مجھ سے جڑے، دوسرے لوگوں کے لئے بھی، آج کا  دن بہت اہمیت کا حامل ہے۔ کیونکہ، آج میں، اپنا 50 سالہ پُرانا قرض  اُتارنے کے قابل ہو رہا ہوں ۔ میری عمر  52 سال ہونے کو ہے۔ قریباً 48 سال قبل، میں نے  قلم  کو اپنے ہاتھ میں لیا اور ا، ب، اور پ کے ’تاریخی‘ حروف کو نقل کیا ہو گا۔ یہ سلسلہ آج، اپنی معراج کو چھو رہا ہے، لیکن فقط میری حدّ تک!

اوراقِ زندگانی، اب آپ کے ہاتھوں میں ہے۔  یہ ابھی بھی، میری زندگی کیطرح،   ورق، ورق اور نامکمل ہے۔ تحریرات کے اِس مجموعے کے دو بڑے مقاصد ہیں:

 اوّل  یہ کہ اپنے بزرگوں کے معروف احوال، ایک جگہ قلمبند کرنا۔

 دوم ، اپنی ذاتی غلطیوں اورکوتاہیوں سے، اپنے چھوٹوں کو آگاہ کرنا تاکہ وہ  اِن کو دُہرانے سے باز رہیں!

عزیزی سلمان اینڈ برادرز، اِس کتاب کے اولین مخاطب ہیں۔ اور بدقسمتی سے، وہ ابھی تلک  تو اُردو  پڑھنے سے قاصر ہیں!  لیکن سُن اور سمجھ سکتے ہیں۔ اِسکے باوجود، میں نے انگریزی کی بجائے، اُردو کو اپنے مافی الضمیر  کی ترجمانی کا ذریعہ بنایا ہے تا کہ اپنے بہن بھائیوں اور اُنکے بچوں تک تو یہ تحریر، اپنے اصل مطالب کیساتھ، پہنچ سکے۔ اللہ کرے کہ دوسروں کے دیکھا دیکھی، میرے بچے بھی، اِس کتاب  کیوجہ سے ہی،  اُردو پڑھنا  شروع کر دیں!

آپ نے اکثردرج ذیل فقرات دیکھے اور پڑھے ہونگے:

’’جملہ حقوق محفوظ ہیں‘‘

’’یہ مُصّنف یا مؤلف کی ذاتی رائے ہے۔ ادارہ یا قارئین کا اِس سے اِتفاق ضروری نہیں‘‘

’’اِس تحریر  میں تما م نام ، کردار اور واقعات فرضی ہیں‘‘ وغیرہ وغیرہ!

یہاں، ایسا کچھ بھی نہیں! وہ سب تو، اپنی ذمہ داریوں سے ’’فرار‘‘ ہو تا ہے۔ البتہ، ہمارے ہاں، اگر کچھ ہے، تو وہ ’’ اِقرار ‘‘ہے!  سب  نام و کردار، حقیقی اوراصلی ہیں ۔ البتہ، جہاں جہاں، سیدھی اور سچ  بات کر نا مشکل تھا، وہاں ادبی صنف ِافسانہ کی مدد مُستعار لی گئی ہے۔

کچھ  لوگوں کے لئے، اِس تحریر میں شائد، کوئی کشش یا نیا پن نہیں ہوگا۔ کیونکہ اُنکے بقول، سب کچھ تو اُن کے سامنے ہوتا رہا ہے! وہ اپنی سوچ اور خیال میں، ٹھیک ہی ہونگے۔ لیکن، وہ  کسی کی نہ نظر آنیوالی بہت سی خواہشات، اپنی مجبوریوں پر چُپ ہو جانےکی صبرآزما تکالیف اور اپنی ناکامیوں پر پیدا ہو نیوالی محرومیوں کے اثرات سے، یقیناً نابلد ہو نگے۔  کیونکہ، ہم سب یہ تو مانتے ہی ہیں، کہ دلوں کے بھید تو فقط، ربّ تعالیٰ ہی جانتا ہے، کوئی بشر نہیں۔

کچھ کہیں گے کہ فُلاں با ت، یُوں نہیں، بلکہ یُوں تھی! فُلاں واقعہ تو بیان ہی نہیں ہوا۔ یا فُلاں، نام درست نہیں، وغیرہ وغیرہ! ۔۔۔۔ سَرِتسلیم خَم !

عرض یہ ہے کہ  قبل ازیں، تو اِس موضوع پر، کوئی تحریر، تا حال، ہماری نظروں سے گزری  نہیں ہے۔ اگر ہے ، تو سامنے لائی جائے!  اِ سکے باوجود بھی، اگر آپ کو اعتراض ہے تو، اپنا ’’بیانیہ‘‘ سامنے لے آئیے! کِس نے روکا ہے، جناب عالی ! اور بقول ِ شاعر:

؎ صلائے عام ہے ، یارانِ نُکتہ داں کیلئے!

اِس ضمن میں، آخری بات! یہ گزشتہ بیس سالوں  کی ریاضت کا نامکمل  ثمر ہے۔ یہ کتاب، ’’آن لائن‘‘ بھی ہے اور’’اِن لائن‘‘ بھی! یعنی جاری و ساری ہے۔ تمام مضامین میں، ضروری اور مفید  اضافہ، انشاء اللہ تعالیٰ، جاری رہیگا۔ آپ، ہر مضمون کے آخرپر، دستیاب خانے میں، اپنی رائے، تبصرے اور مفید مشوروں  سے بھی نواز سکتے ہیں، جزاکم اللہ تعالیٰ خیرا۔

کچھ ’’پیش لفظ‘‘  کے بارے میں بھی!  یہ  بہت خاص تحریر ہوتی ہے۔ سب سے آخر پر لکھی جاتی اور سب سے پہلے ’پیش‘ کی جاتی ہے۔  کچھ ’’پیش لفظ‘‘  بہت لمبے اور’’پیچ در پیچ‘‘ بھی ہو جاتے ہیں! میں، اُس روش سے  بچتے  ہوئے،  اپنے محسنوں کا  باالترتیب، ذکرِ خیر  کر کے، (کہ جن  کی مدد کے بغیر، میں  یہ کام  کبھی نہ کر پاتا) اِسکا اختتام کرنا  چاہوں گا۔

اِس کام میں، میرے سب سے بڑے مُحسن، راؔوی اور ذریعہ (سورس)،  میرے نانا مرحوم ، میاں مولا بخش صاحب مرحوم ہیں۔ دوسرے مرحوم کے بھتیجے،  میاں محمد صدیق صاحب مرحوم، تیسرے میری والدہ محترمہ بشریٰ بیگم صاحبہ، میرے ماموں میاں بشیر احمد صاحب مرحوم ، میرے تایا جان، میاں نور محمد صاحب مرحوم، چوہدری محمد عبداللہ صاحب مرحوم  اور میرے بڑے تایا ذاد بھائی (ڈاکٹر) ناصر احمد جاوید صاحب مرحوم کے علاوہ  کئی چھوٹے، بڑے عزیزو اقارب کے تعاون کا، بے حدّ ممنون ہوں اور ہمیشہ، اِنکے لئے  دُعا گو رہوں گا، انشاء اللہ تعالیٰ۔

دوسرے، میرے عزیزدوست، مُحسن اوراُستاد، شیخ نصیر احمد صاحب (واقفِ زندگی۔ شعبہ رشین ڈیسک)  جنھوں نے مجھے ، دَورِ جدید کی  قلم چلانا سکھائی یعنی اُردو ٹائیپنگ، سیٹنگ اور کمپوزنگ  سکھائی۔ اِس آن لائن کتاب اور میرے  تمام  ذاتی و جماعتی کام، جو  کمپیوٹر سے متعلق تھے، سر انجام  دینے میں،  ہمیشہ میری بھرپور اور بے لوث مدد فرمائی۔ اِس دوران، آپ نے کبھی ، دن اور رات کا، فرق روا نہیں رکھا۔ اللہ تعالیٰ ، آپکو اِس محبت  و تعاون کی بہترین جزا عطا فرمائے اور آپکے اہل ِ خانہ کا بھی ہمیشہ حامی و ناصر رہے، آمین۔

یہ بھی سچ ہے اور بالکل سچ ! کہ طبائع کے بے شماراختلافات کے باوجود، میری  اہلیہ محترمہ صائمہ صاحبہ نے بھی، اِس معاملہ میں میرا بھر پور ساتھ دیا۔ شائد، اُسے کچھ غلط فہمی تھی کہ  کتاب کے نشر ہو تے ہی ، ہمارے معاشی و معاشرتی حالات میں، کوئی معجزانہ  تبدیلی آجائے گی۔ ایسا نہ  تو ممکن  تھا اور نہ  ہی  تاحال  ہو سکا ہے! کیونکہ، میں بھی آپ  سب کے ’’معاشی اور معاشرتی ‘‘ حالات سے بخوبی آگاہ ہوں۔ البتہ، بذریعہ دعُا، اِن حالات میں بہتری ضرور ممکن ہے۔ لہذا، آپ سب سے اِس  بابت دُعا کی درخواست ہے۔

دوسرے، میرے ایک دوست اورعزیز کہ جن کے تعاون  اور حوصلہ افزائی کے بغیر، میں نہ تو  یوروپ آ سکتا تھا (اور نہ ہی یہاں رہ سکتا ہوں) اگر میں  نے اُن کا ذکرِ خیر نہ کیا!   اور وہ ہیں، محترم میاں محمد محمود احمد صاحب! میرے، اِس کام   کو سب سے پہلے اور سب سے  زیادہ  سراہنے  والے، آپ ہی ہیں۔ آپکی محبتوں اور نوازشوں کا، یہاں، مختصرترین اعتراف، کم از کم، میرے کاندھوں سے اِتنا  بوجھ  تو ضرور ہلکا  کردے گا کہ میں آگے بڑھ سکوں!

یہاں، میں ایک ’’غیر‘‘ ضروری وضاحت  بھی کر نا چاہتا ہوں! عزیزم ندیم احمد طاہر صاحب میرے چھوٹے بھائی نہیں ہیں۔۔۔۔ بلکہ ۔۔۔۔ بہت پیارے چھوٹے بھائی ہیں۔ وہ میرے عزیز دوست، معاون، مشیر اوردست راست بھی ہیں۔ اِس ایک معاملے پر میں ،اُن کا شکریہ ادا کرکے،  باقی تمام معاملات کو پسِ پشت نہیں ڈال سکتا۔ لہذا،  اِسے ایسے ہی رہنے دیتے ہیں! البتہ ، اُن کے لئے اور اُنکے سارے پیاروں کے لئے  بقول فیض احمد فیضؔ :

آیئے ہاتھ اُٹھائیں ہم بھی

ہم، جنہیں رسمِ دُعا یاد نہیں!

ہم جنہیں، سوزِ محبت کے سِوا

کوئی بُت، کوئی خدا یاد نہیں!

23 اپریل 2020ء